Det er enno nokre dagar att til båla vert tent over det ganske land. Meteorologane byrjar likevel å sjå konturane av kven som stikk av med det beste vêret.
Mariann Foss varslar vêret for Jonsokafta.
Foto: Marit Hommedal– Det ligg an til at Nord-Noreg får det tørraste vêret sankthans, medan det på Vestlandet er størst fare for regn, seier statsmeteorolog Mariann Foss.
Sør- og Austlandet får varmen
Austlandet ligg litt midt i mellom med 50–70 prosent fare for regn.
– Også på Sørlandet er det moglegheit for regn, men den er ein del lågare. Det er framleis litt vanskeleg å gje eit klart skilje, fortel statsmeteorologen.
Klokka 14.00 på fredag ser det ut til å bli varmast ved kysten frå Hvaler (Østfold) til Kristiansand (Vest-Agder). Kanskje er det ytre strøk av Telemark som kjem aller best ut, med om lag 19 grader i Skien.
Mest sannsynleg kjem ingen stader i Noreg over 20 grader.
Samtidig har også Skagerak og kysten høgast utslag på vind. Men det er ein søraustleg vind som bles inn varme luftmassar, forklarar Foss. Også i Trøndelag vert det greie temperaturar. Kanskje får du over 16 grader fredag ettermiddag.
Kaldt i nord
Til trass for at Nord-Noreg vert tørt, bør ikkje ytterjakka leggast igjen heime av den grunn. Jobbar vi oss lenger ned på temperaturmålaren finn vi Nord-Troms, Finnmark og Spitsbergen på botn. Mest sannsynleg vert det under ti grader her.
– Kaldast vert det i Spitsbergen som får om lag 5–6 grader. Deretter er det indre strøk av Troms og Finnmark (og høgfjellet i Sør-Noreg) som får lågaste temperaturar på 8–10 grader.
Det ser også ut til å bli ein del vind i områda Troms, Lofoten og Vesterålen på kvelden.
