Store deler av landet har denne veka fått nyte vakker haustsol og gode temperaturar. Fredag held dette fram, men utover helga blir det noko nedbør og kaldare i heile Noreg.
– Det er ikkje heilt slutt på det fine vêret. Men spesielt på Vestlandet blir det ein del regn denne helga. Når me kjem til søndag blir det lågare temperaturar i heile landet, og det liknar litt meir på haust, seier Eldbjørg Moxnes ved Meteorologisk institutt i Oslo.
– Mykje fint vêr i vest
Vestlandet og Trøndelag er deler av landet der dei fleste har vore heldige med vêret denne veka. Slik held det fram når det går mot helg.
– Her får ein mykje fint vêr på starten av helga. Unntaket er dei sør for Stadt som slit med litt tåke. Dei vil kanskje ikkje tykkje vêret er så bra, men tåka vil lette etter kvart, seier Anne-Mette Olsen ved Vervarslinga på Vestlandet.
Sør for Stadt vil det framleis vere nokså varmt, med temperaturar opp i 20 grader. Men så kjem nedbøren på laurdag. Det kan komme opp i 15–25 mm i ytre strøk, og regnbyer vil ein her få til godt ut på søndag.
– Kan merke den fyrste snøen i høgda
Fredag blir også den finaste dagen i helga for folk i Nord-Noreg. Laurdag skyar det til, og det kjem periodar med nedbør.
– Ut på laurdag og natt til søndag er det sjanse for snø i høgda. Folk kan komme til å merke det på nokre av fjellovergangane, og det kan sludde litt på kysten av Finnmark og i Nord-Troms, seier Ida Fossli ved Vervarslinga for Nord-Noreg.
Som i resten av landet vil det også i nord bli langt kjøligare på søndag.
- Skal du på jakt i helga? Les meir om det perfekte jaktværet
Lokal morgontåke
På Austlandet byrjar helga med opphaldsvêr og periodar med sol, både i fjellet og i låglandet. Fredag vil det framleis vere varmt og godt, med opp i 18 – 20 grader.
– Ein vil merke lokal morgontåke på Austlandet. Det er typisk for september at denne tåka blir liggande også litt ut på dagen, seier Per Egil Haga ved Meteorologisk institutt.
Laurdag ser noko gråare ut med skyer og nedbør i fjellet, men søndag blir det igjen opphaldsvêr og gode sjansar for å få nyte sola.
– Det kan komme ein liten drope på Austlandet og i Telemark også, men snø vil folk enda ikkje merke noko til her, seier Haga.