Kvar kveld ser me dei i stramme jakker framfor vêrkartet. Med eit varsamt smil om munnen peikar dei på lågtrykk utanfor kysten og forklarar korleis vinden bles. Men dei siste fire vekene har meteorologane synt seg frå ei heilt ny side.
– Eg har ikkje sove godt sidan det med ballettskjørtet, seier statsmeteorolog Kristian Gislefoss, før han raskt parerer.
– Neidå. Det var morosamt å gjere noko anna enn den vanlege vêrmeldinga me syner 365 dagar i året, men akkurat det med skjørtet blir fyrste og siste gong.
- Sjå alle innslaga til «meteorologlandslaget» nedst i saka
– EG SAKNAR Å BLI INVITERT PÅ FEST: Her er Kristian Gislefoss slik me er vanen med å sjå han. Etter strutteskjørtet har eg ikkje blitt bedd på fest, spøker han.
Foto: NyhetsspillerHar gitt alt for vêret
Målet har vore å forklare vêrfenomen for folk på ein enkel og morosam måte.
– Det har vore veldig, veldig moro og utfordrande, seier statsmeteorolog Siri Wiberg Horjen. Me har måtte sleppe oss laus og vere litt skodespelarar.
Ikkje alt som skjedde under opptaka kjem fram på TV. Siri Wiberg Horjen skreik, hoppa og sleit bokstaveleg talt ut Terje Alsvik Walløe då ho spelte sitt livs rolle som «nordmannen».
– VELDIG, VELDIG MORO: Siri Wiberg Horjen synte seg frå ei heilt ny side under innspelinga av TV-serien «Værbitt».
- Sjå Wiberg Horjen i «Meteorologlandslaget syner kvifor Noreg er kaldt» nedst i saka
Myten om meteorologen er knust
Statsmeteorologane har dansa i tyllskjørt, leika lågtrykk, dramatisert ein austavind og med grasiøse steg trippa kring som snøkrystallar. På kjøpet har myten om den tørre meteorologen fått seg ein trøkk.
– Ballettskjørtet er nok det folk flest har lagt mest merke til, seier Terje Alsvik Walløe, statsmeteorolog og vêrformidlar på «meteorologlandslaget».
Han trur folk har likt å sjå at meteorologar kan vere både morosame og uhøgtidlege.
– Folk seier det har vore kjekt å ikkje berre sjå oss gøymt bak dress og slips. Me har bydd på oss sjølv, og det verkar det som om folk har sett pris på.
I DRESS OG SLIPS: Slik er me vanen med å sjå statsmeteorolog Terje Alsvik Walløe. I vêrserien «Værbitt» har han og dei andre meteorologane synt seg frå ei heilt ny side.
Foto: NRKViktig å vere truverdige
For meteorologane er det viktig å stå fram som truverdig. Kjem det eit skikkeleg uvêr skal folk kunne stole på at varselet frå meteorologane er korrekt.
– Det gjeld for alle som jobbar med nyheiter og vêr. Skal ein bli tatt seriøst, må ein vere truverdig. Me skal vere litt tilbakehaldne og ikkje stille opp på alt mogleg, seier meteorolog Terje Alsvik Walløe.
Han meiner meteorologlandslaget har halde seg innafor denne grensa på innslaga under «Værbitt» – sendingane.
– Programmet har hatt eit fagleg innhald, og me har stilt opp for å forklare meteorologiske fenomen. Her er me godt innanfor, men det finst absolutt ei grense for kva me vil og kan stille opp på, seier Alsvik Walløe.
Han meiner innslaga til meteorologane kan ha gjort det lettare for folk å forstå vêrfenomena som er kring oss kvar dag, heile dagen.
– Det har vore eit forsøk på å gjere ting fysiske og konkrete. Å bruke levande folk for å forklare vind og nedbør har eg ikkje sett blitt gjort før.
Meir moro frå «meteorologlandslaget»?
Siste program i serien «Værbitt» går i kveld på NRK 1, 20.15. I den avsluttande episoden skal Eli Kari Gjengedal, John Smits og meteorologane forklare blokkerande høgtrykk.
– Fristar det med ein ny runde med meteorologlandslaget?
– Me seier ikkje nei takk til det. Eg trur alle tykte det var ein fin ting å vere med på, så me er gjerne med på ein ny runde, seier Terje Alsvik Walløe.
