Grå og våt helg i vente

Austlandet har mest å sjå fram til denne helga. Ellers i landet er det gode tilhøve for å teste støvlar!

Sunnmørsalpane i skoddedis. Fangar sola

VENTAR: Mange har sett sola mest gjennom skyene denne sommaren. Også denne helga blir det meir skyer enn blå himmel, spesielt i Sør-Noreg.

Foto: @lenahvatsaas/Instagram

Våtast blir det på Vestlandet i helga, og det kan fort bli ny nedbørsrekord for stasjonen Florida i Bergen om varsla slår til.

Laster Twitter-innhold

Men lat oss ta dei gode nyheitene først!

Her er det størst sjanse for sol

– Austlandet får vel det beste vêret, fortel statsmeteorolog Mathilda Hallerstig frå vêrvarslinga i Tromsø.

For dei som ligg lengst aust ligg lengst vekke frå lågtrykket utanfor vestlandskysten.

Nokre regnbyer vil snike seg over på austsida av Langfjella, så størst sjanse for sol er det i Oslo-området og elles langs kysten.

– Laurdagen ser det ut til at det kan bli ein del regnbyer, men søndag blir det sol og betre vêr, er dei beste nyheitene meteorologen har på lager.

I Trøndelag ser fredag og starten av laurdag ut til å bli lettare på vêrfronten. Men også trønderane vil merke byene som kjem opp frå sør i løpet av helga.

Regnboge, sol og molte

SESONG: Ein Yr-brukar delte dette fine bildet med oss på #yrno på Instagram. Går du på tur i helga kan du oppleve både sol og regn, og kanskje finn du noko godt å putte i munnen?

Foto: @aashildhaave/Instagram

Her blir det mykje av det våte

Vestlendingane kan få lov til å seie seg minst fornøgd med meldingane denne helga. Eit lågtrykk har sett stand mellom Shetland, Island og Noreg. Det sender regnbyer inn over store delar av Sør-Noreg i helga.

Får Florida ny juli-rekrod? Det er spørsmålet hos vêrvarslinga på Vestlandet.

Dei manglar 14,3 mm nedbør for å notere ny rekord på stasjonen som har registrert nedbør sidan 1983.

– Det er jo litt kjekt med rekordar, sjølv om denne er litt trist! Temperaturane har ikkje vore så ille i sommar, då. Rundt ein halv grad over normalen, fortel meteorolog Anders Sivle for muntre opp regntrøytte vestlendingar.

Fredag 28. juli meteorologens værkart

STASJONÆR: Lågtrykket utanfor kysten av Vestlandet har sett seg godt til rette. I løpet av helga vil det bevege seg litt nordover, og dele regnet sitt ut til dei aller fleste. Berre Austlandet ligg litt i le av langfjella, og kan få ein beint fram fin søndag.

Foto: Yr.no

Også i Nord får dei merke på lågtrkksaktiviteten.

Ein frontrest ligg og sleng i starten av laurdagen, og vil gi tungt og grått vêr i starten av helga. Mot søndagen sig lågtrykket som gir vått vêr i Sør-Noreg seg mot nord, og deler regnbyene med nordlendingane også.

Held fram i same bane

Det er i grunn varierande vêr som held fram å prege denne sommaren, konkluderer mathilda Hallerstig.

Lågtrykka ser ikkje ut til å late oss vere i fred, og ingen sterke høgtrykk ligg an til å redde sos med strålande sommarvêr med det første.

– Men det er varierande vêr, så det er alltids nokon som får litt betre vêr! Berre ikkje over lengre tid heilt enda, trøysta meteorologen.

Riktige klær for været

RIKTIG KLEDD: Slik kler du deg på tur i helga! Det finst ikkje dårlige klede, og så vidare..

Foto: @ingjohn/Instagram