Eit skikkeleg vêrskifte er i emning i starten av veka. Vinden snur frå nord til sør, og snøgrensa kryp oppover igjen.
No er det slutt på finvêret, melder meteorologen frå vêrvarslinga på Vestlandet – der helga baud på blå himmel og strålande sol.
Sønnavind og regnbyer
Over Island ligg eit lågtrykk og vakar. Allereie måndag snur det opp ned på vêret, og bringar mild og fuktig luft inn frå havet.
Pålandsvind og nedbør blir tendensen resten av veka, fortel Martin Granerød ved vêrvarslinga på Vestlandet.
– Vekas verste blir torsdag og fredag, då blir det veldig mildt. Det kan bli opp mot 10 plussgrader i låglandet, og det er fleire frontar som skal passere. Det vil bli vått frå torsdag ettermiddag til fredag kveld, melder Granerød.
Det milde vêret saman med mykje nedbør som regn, sludd og snø i høgfjellet, kan gi vanskeleg tilhøve i fjellet.
– På det mildaste kan det regne opp til 12-1300 meter. Det blir mykje vind, snøfokk og vanskelige køyreforhold i fjellet frå torsdag til søndag, åtvarar langtidsvakta Øyvind Johnsen i Oslo.
Nord for Stad er starten på veka litt betre. Tysdag kan by på opphaldsvêr og kuldegrader natt til onsdag, men torsdag blir i same stil som lenger sør.
Siste sola i nord
Denne veka startar mørketida fleire stader i nord. Utanfor vindauget til Rafael Grote ved vêrvarslinga i Tromsø kan sola vise seg for siste gong på to månader denne veka, men den får ikkje mange sjansar til å stikke seg fram.
Også i nord kjem lågtrykket med mildt og fuktig vêr.
– Det ser ut som at den neste perioden får mykje ustabilt vër. Ein del nedbør som regn, og mot helga litt over mot sludd og snø, summerer meteorologen opp.
Rafael Grote sitt tips er at snøgrensa vil ligge rundt 600 moh. Det er meir sikkert at nedbøren kjem som regn i låglandet i Nordland, medan det vil bli store lokale forskjellar Troms og Vest-Finnmark.
Også lengst nord er det torsdag, fredag og helga som ser verst ut, om du er ein av dei som ikkje er glad i nedbør og vind i alle fall.
Best blir det i Aust-Finnmark og lengst nord i Troms mot helga.
Austafjells kan vêrskiftet skape trafikkproblem, fortel Espen Biseth Granan ved Meteoorlogisk institutt i Oslo.
– Tysdag kjem nedbøren inn med litt mildare luft enn vi har no. Mange stader vil nedbøren komme først som snø og så regn, og det kan skape litt problem for vegtrafikken, åtvarar meteorologen.
Men onsdag kjem ein ny runde med kald luft i det austafjelske, og det ligg an til ganske fint vêr for mange. Faktisk kan det ligge an til lengre periodar med sol og fint vêr i Austafjells frå torsdag til søndag.