Sommaren er like rundt hjørnet, og med det også den mest aktive perioden for torevêr. Mads lurer derfor på: Kva er den beste måten å forutsjå det på?
- LES OG:
Du kan lese deg opp
Den beste metoden å forutsjå torevêr, er å følgje med på tekstvarselet til meteorologen. Meteorologen har oversikta over stabiliteten til lufta over oss, og om det i heile tatt er mogleg å få danna torevêr. Å følgje med varsla på Yr er sjølvsagt også ein god måte å holde seg oppdatert på, men her er det utfordringar med at varselet gjeld kun for eit punkt, og ikkje alltid får med seg kva som skjer på himmelen i ein litt lenger omkrets.
Torevêr kan vere små og lokale, og er ikkje alltid riktig plassert i verprognosane. Derfor kan det vere lurt å sjekke fleire punkt på Yr ein sommardag, og også fleire gangar per dag. På Yr blir verprognosane oppdatert fire gongar per døgn.
Sjå opp mot skyene
I naturen kan skyene gje ein peikepinn på om det er utrygt for torevêr. Ser skyene ut som ein blomkål, er det eit teikn på at tilhøva i atmosfæren er ustabile og skyene kan vekse seg store nok til at det blir danna regnbyer, og kanskje torevêr. Som regel stogga utviklinga av skyene opp før det utviklar seg til torever, men av og til så kan utviklinga av skyene fortsette til eit fullt utvikla torevêr. Figuren under syner dei ulike stadia for eit fullt utvikla torevêr.
Mørke skyar
I fleire tilfelle kjem torevêret sigande ein fin sommardag, utan å følgje den klassiske skyoppbygginga. Er skya som kjem sigande mørk, desto større sjanse er det for at det er eit torevêr. Her kan ein få forvarsel ved at det blinkar eller tordnar i det fjerne. Om du har moglegheit, er det lurt å ta fram mobilen og følgje med på nedbørradaren på Yr. Her kan ein også få lynregistreringar saman med nedbørobservasjonane.
Håret reiser seg
I nokre ekstreme tilfelle kan ein rett før torevêr oppleve at håret reiser seg som følgje av statisk elektrisitet i lufta. Dette er eit dårleg tegn ettersom at du dermed kan vere eit potensielt punkt for lynnedslag! Søk dekning eller legg deg ned, lyn søkjer høge punkt i terrenget ved lynnedslag. Så lenge du høyrer torevêr, utgjer lyn ein fare.