Orkanen «Patricia» bryt alle rekordar. På under eit døgn vaks den til å bli ein kategori fem-orkan med vindstyrke på 325 km/t.
I kveld er den venta å gjere landfall i Mexico, og med kraftig vind, nedbør og flaum kan konsekvensane bli svært alvorlege.
Tropiske orkanar har teke mange tusen menneskeliv, og gjort skadar for millionar av kroner verda over.
Her er nokre av dei kraftigaste orkanane gjennom historia:
Den tropiske syklonen «Bhola» (1970)
Den dødeligaste tropiske syklonen i verdshistoria, var syklonen «Bhola». I november 1970 trefte den syklonen Aust-Pakistan, det som i dag heiter Bangladesh. Stormen drap over 300.000 menneske, hovudsakleg som følge av massive flaumar i dei lågtliggande områda langs kysten.
Syklonen var av kategori tre, og hadde vindstyrke på 205 kilometer i timen (130 mph) målt i eitt minutt.
Tyfonen «Tip» (1979)
Tyfonen Tip ramma Japan, Russland og Caroline-Øyene i oktober 1979. Fram til Patricia vart forma i rekordfart i Stillehavet, hadde «Tip» det lågaste lufttrykket nokon gong målt i ein orkan.
Men 880 mb har «Patricia» tangert den gamle rekorden, melder NOAA.
«Tip» hadde ein styrke på 305 kilometer i timen (190 mph), og tok 99 liv.
Orkanen «Katrina» (2005)
«Katrina» var den rekordsettande orkanen i den rekordsettande orkansesongen 2005, skriv Weather.com.
Orkanen ramma Bahamas, Cuba og USA. Det var den dødeligaste stormen i amerikansk historie, med 1833 liv som gjekk tapt.
På verdsbasis har mange tropiske orkanar har teke fleire liv, men ingen orkan har vore dyrare enn «Katrina».
Orkanen gjorde skadar for over 100 milliardar dollar. Katrina var ein kategori fem-orkan, og hadde ei gjennomsnittleg vindstyrke på 280 kilometer i timen (175 mph) målt i eitt minutt.
Orkanen «Katrina» la store delar av millionbyen New Orleans under vatn, og tusenvis av menneske mista heimane sine.
Foto: David J. Phillip / ApTyfonen «Haiyan» som herja Filippinane (2013)
Tyfonen Hayian var ein av dei fire sterkaste stormane nokon gong, og den sterkaste som nokon gong hadde treft land når den gjorde landfall over Filippinane november 2013.
Filippinane ligg slik til at dei ofte blir treft først av stormar som blir danna over sentrale delar av Stillehavet. Over 6000 menneske mista livet i tyfonen, og FN anslo at over 1,1 millionar filippinarar vart råka.
Haiyan hadde vindstyrke på315 kilometer i timen (195 mph).
«Pam» raserte stillehavsøyer (2015)
Ein av dei nylege orkanane var «Pam», som raserte dei fattige stillehavsøyene i Vanuatu i mars i år. Stormen dekka nesten alle dei 80 øyene i staten, og øydeleggingane var enorme.
Kategori fem-stormen var ein av dei sterkaste som har vore forma i det sørlege stillehavsbassenget, og den hadde ein fart på 270 km/t (165 mph).
I det varme Stillehavet er det ideelle for tropiske stormar å vekse fram. Her er dei fem sterkaste i det austlege stillehavsbassenget der «Patricia» vart danna:
Les meir om syklonar:
