Dårleg vêr gjorde at rekordmange brukarar brukte yr.no til å sjekke vêrvarselet. I fylgje TNS Gallup var 514 000 unike brukarar innom sidene i førre veke. Førre rekord var i veke 45 i november, då 428 000 unike brukarar var innom sidene. Det vart òg rekord i sidevisningar på éin dag: Sist fredag vart det vist over ein million sider på yr.no!
– Vi lanserte yr.no 19. september, og hadde aldri trudd at tenesta skulle bli så populær i løpet av kort tid, seier yr-redaktør Erik Bolstad. Vi set særleg stor pris på alle dei hyggelege e-postane vi får frå publikum, med framlegg til endringar og forbetringar.
Kvar brukar er i snitt innom yr.no 2,5 gongar i veka, og ser i snitt på 10 ulike sider, i fylgje TNS Gallup. I førre veke var varsla for Oslo, Kristiansand, Bergen, Stavanger og Agder mest brukt, dette er områda som har fått mest snø dei siste dagane.
Arbeider på spreng med å få opp farta
yr.no er framleis under oppbyggjing, og alle delane av tenesta er ikkje dimensjonert for å handtere så mange brukarar som tenesta hadde i førre veke. Ein del av brukarane har difor fått feilmeldingar, og nokre opplever at det tek lang tid å få opp sidene.
– Vi har lagt ned eit stort stykke arbeid i haust og vinter både i NRK og på Meteorologisk institutt for å gjere sidene raskare å bruke, og kjem til å gjere endå meir i dei kommande vekene, seier IT-direktør Roar Skålin på Meteorologisk institutt.
Dersom du får ei feilmelding der det står «Noko gjekk gale», prøv å trykkje F5 (Oppdater). I dei fleste tilfella ordnar dette problemet. Vi arbeider med å få fjerna denne feilmeldinga heilt.
Dette kjem på yr.no
Det aller viktigaste for redaksjonen bak yr.no, er å få opp farta på sidene og å få inn større og sterkare maskiner. I tillegg arbeider vi med fleire andre nye tenester som vil kome utover våren:
- Utskriftsvenleg versjon. Vi kjem til å lage ein eigen PDF-versjon av sidene, som eignar seg til utskrift og oppslag. Tilbodet skulle blitt lansert i haust, men programmerarane har prioritert å arbeide med å få sidene raskare i staden.
- Vêrstatistikk. Vi arbeider med eigne sider med vêrstatistikk for alle kommunane i Noreg. Sidene vil vise målingar frå det siste året, kva som er normal temperatur og nedbør, samt snødybde og dei ferskaste målingane. På sikt håpar vi å få vêrstatistikk for resten av verda òg.
- Oppdatering av stadnamn. Mange av feilemeldingane vi får frå publikum, går på feilskriving av stadnamn eller feilkopling av stader som har svært like namn. Vi håpar å få retta på dette i løpet av januar og februar.
- Satellitt. Vi arbeider med eigne satellittsider, der du kan sjå dei siste satellittbileta av Noreg og Europa. Sidene vil truleg kome i løpet av fyrste halvår i 2008.
- Meir detaljerte varsel for utlandet. Tidlegare hadde yr.no varsel for kvar sjette time for land utanfor Skandinavia. Dei siste vekene har vi lagt ut meir detaljerte varsel (varsel for kvar tredje time) for alle land utanom Nord-Europa. Vi arbeider med å få på plass meir detaljerte varsel for desse landa òg.
Ta gjerne kontakt med oss dersom du har andre framlegg til tenester!