Dine bilder kan pryde internasjonalt sky-atlas

Har du nokre blinkskot av skyer på lager? Verdas meteorologiforbund skal lage atlas for skyer, og du kan bidra.

skyer

Nokre skyer er store og klumpete, medan andre er tynne og gjennomsiktige. Eit sky-atlas fortel kvifor skyene ser ut som dei gjer.

Foto: Siw Lerstad

Høge, låge, gjennomsiktige og massive. Skyer kjem i alle slags former og fargar, og kan vere både vakre og fryktinngytande å sjå på. For mange er dei eit ynda fotomotiv.

No er Verdas meteorologiorganisasjon (WMO) er på friarferd til hobbyfotografar og skyentusiastar over heile verda.

Dei vil ha dine beste bilde for å skape eit atlas for skyer som er tilgjengeleg for eit verdsomspennande publikum.

Lærebok for meteorologar

Meteorolog Kjersti Opstad Strand

Det nye sky-atlaset står på ønskelista til meteorolog Kjersti Opstad Strand – og sikkert mange andre som er interesserte i vêr og vind.

Foto: Kamilla Pedersen

– Dette er kvalitet! Det seier meteorolog Kjersti Opstad Strand om sky-atlaset, som sjølvsagt står i hylla på Meteorologisk institutt.

– Ofte nøyer vi oss med eit mindre hefte som vi har laga sjølv, men av og til er det vanskeleg å bli einige om kva skytype vi observerer. Om vi er usikre, så finn vi fleire detaljar i denne boka, fortel Opstad Strand.

Skyatlaset vart første gong publisert i 1896, og bestod den gong av 28 bilde. Den nyaste versjonen vart gitt ut i 1987, og no er det på tide med fornying.

I tillegg til å fungere som lærebok for meteorologar, er også eit viktig verktøy for folk som jobbar i luftfart eller på sjøen der vêret er ein viktig del av jobbkvardagen.

For meteorologen står det nye sky-atlaset på ønskelista, og det gjer det nok også for vêrentusiastar rundt omkring.

Soloppgang ein plass på austlandet

Skyer kan gjere både soloppgangar og solnedgangar ekstra spektakulære.

Foto: @unni1962 / Instagram

Har du ein hobbyfotograf i magen?

– Både vitskap, teknologi og fotografi har utvikla seg dei siste 40 åra, så no er det nødvendig å oppdatere atlaset, sa George Anderson frå det britiske Met Office.

Dette ser meteorologiorganisasjonen etter:

– WMO ser etter bra komponerte bilde, i fokus og riktig eksponerte bilde av ulike skyer og andre vêrfenomen, slik som lyn, regnbogar, snø, tåke eller støv, skriv Met Office i ei pressemelding.

I tillegg til å oppfylle krava teknisk, skal du legge ved informasjon om kvar og når bildet vart teke, samt informasjon om korleis vêrforholda var når du knipsa.

Kanskje skal dine bilde lære folk om skyer i framtida?

Skyer over elv i Sør-Trøndelag

Skyer er fine fotomotiv, og det er Yr-brukarane flinke til å utnytte!

Foto: @viken61 / Instagram