Det er ikkje verken palmesus eller varme å spore langs norskekysten i oktober.
Derimot er det mykje bølgebrus på denne tida.
Det er nok til å få ivrige bølgesurfarar til å dra på våtdrakta, ta brettet under armen og hoppe i havet som held nokre fattige plussgrader.
Meir vêr, større bølger
– Bølger er påverka av vind. Jo lenger den får verke og jo sterkare den er, dess fleire bølger vil du få. Vinden er knytt til lågtrykksavktivitet, forklarar Ole Johan Aarnes.
Aarnes er forskar på bølger ved Meteorologisk institutt. Det får han også bruk for på fritida, for forskaren er også surfar.
I Noreg er vêret prega av meir lågtrykksaktivitet om hausten og vinteren. Lågtrykk gir vind, og vind gir bølger. Men kvifor er det ikkje like mange og kraftige lågtrykk heile året?
- Les også: nå er det høst, men hvorfor det?
Vêret i Noreg er i hovudsak knytt til kvar polarfronten ligg.
– Polarfronten er skiljet mellom den polare lufta og den subtropiske, varme lufta. Den er ikkje fast, men skvalpar opp og ned på høgare og lågare breiddegrader. I vinterhalvåret er polarfronten plassert slik at lågtrykka kjem inn mot vår kyst, forklarer Aarnes.
Hausten gir også meir av det dårlege
Vind gir meir bølger, og det likar dei som surfar. Men vinden i seg sjølv er ikkje alltid ein god ting.
– Dessverre for norske forhold får vi ofte pålandsvind om hausten. Det er ofte ein sterk vind som går rett mot kysten. Då kan bølgene bli store, men rotete, fortel bølgeforskaren.
Hausten kan også gi perfekte forhold. Den norske surfaren sin våte draum kan sjå slik ut:
– Helst vil du ha er eit kraftig lågtrykk som ligg stasjonert i Nord-Atlanteren og pumpar bølger inn mot kysten, samstundes som at du har rolege vindforhold og frålandsvind over Noreg, skildrar Aarnes.
Frålandsvind er bra fordi det gir reine bølger som held seg lenger før dei bryt.
- Les også:
Men brr. er det ikkje kaldt?
Det kan vere liten barriere å komme seg over når ein skal hive seg i vatnet første gong.
– Med dei rustningane av nokre våtdrakter vi brukte når eg starta å surfe på midten av 1990-talet, så var det litt skrullete. Vi hadde ingen bevegelse i heile tatt, fortel Aarnes.
Men tidene har endra seg, og teknologien har blitt betre.
– No er våtdraktene såpass bra at ein held seg varm. Så det er ikkje spesielt ubehageleg å surfe om vinteren, konkluderer forskaren.