Vesle julaftan skal vi sjå fram mot julekvelden, men også bakover på året som har gått.
Statsmeteorolog John Smits og Yr-journalist har tatt eit djupdykk i vêret vi opplevde i 2015.
I kveld klokka 19.35 på NRK1 får du vêret som var gjenfortalt med snorkel og flytemadrass. Kva det betyr, får du sjå i kveld!
Men du skal få ein liten smakebit:
1. «Nina» og «Ole» starta året med eit brak
2015 starta med eit brak med ekstremvêret «Nina». Ho løfta tak, knuste båtar og herja med orkan styrke fire timar i strekk i Hordaland tidleg i januar. Uvêret herja langs kysten frå Oslo til Hordaland.
Ein månad etter Nina hadde rast frå seg, var det ekstremvêret «Ole» sin tur å frese inn over landet. Ole famna vidt – i fjellet i Sør-Noreg blåste det orkan, og i Nordland og Troms vart det sett nye vindrekordar.
2. Det snødde. Massevis!
Ekstremværa Nina og Ole og andre våte lågtrykk frå havet gav enorme mengder snø i fjellet allereie i januar. Aller mest dumpa det i fjella på Vestlandet.
I Jordalen i Voss kommune målte dei 2,5 meter snø i 17. januar. Då måtte ein ny målestav skøytes på før den gamle vart gravlagt i snø!
Dei store mengdene snø smelta ikkje når våren kom. I midten av juni var det framleis supert skiføre i fjellet.
I Sør-Noreg låg det fem gonger så mykje snø som normalt, og i nord var det dobbelt så mykje som det vanlegvis er i juni.
3. Så kom brr. sommaren
Mange beheldt ulltrøya på til langt utover sommaren i år. Meteorologane konkluderte med at temperaturen for sommaren var 0,2 under det vi er vant til.
Sommarvêret «hang seg opp», og gjennom heile sommaren strøymde kjølig og fuktig luft inn frå havet i vest. Men eigentleg var nok sommaren meir normal enn vi likar å tru, summerte meteorologen opp til slutt.
Når ferien var over, kom sommaren. August leverte førsteklasses sommarstemning til solhungrige nordmenn.
4. I haust har det regna og fløyma over
Frå hausten er det regnet vi hugsar best. Uvêra kom på rekke og rad, og dei store vassmengdene skapte problem i fleire omgangar.
Først ut i starten av september var Sør- og Austlandet, der regn og flaum gjorde skadar for fleire hundre millionar kroner. Eit par veker etterpå kom ekstremvêret «Petra», som heldt fram med å ause vatn over same område.
Oktober starta ikkje særleg betre. Då var det Trøndelag og Nordland som stod for tur. Dei fekk besøk av ekstremvêret «Roar».
Så kom november, og «Synne» råka Sørvestlandet hardt. Vassmengdene oversymde fleire tettstadar, og gjorde stor skade.
I 2015 har ekstremvêr kosta forsikringsselskapa 1,18 milliardar. Det er 65 prosent meir enn i 2014!
5. Vinteren kom igjen som ei overrasking
Vinteren kjem, og kulda er på veg. Men at kulda skulle vere på vegen i november, tok oss på senga i år også.
I desember gjorde kombinasjonen kald bakke og mild luft med mykje regn at vegane igjen vart kraftig isa til. I Hedmark og Oppland hadde folk aldri opplevd maken!
6. Vêret tok liv på Svalbard
Den siste helga i advent vart meir dramatisk enn nokon hadde venta. Stormen som råka Svalbard natt til 19. desember frakta med seg store mengder snø, som la seg i lesida på fjellet Sukkertoppen ved Longyearbyen.
Eit stort snøskred losna, og råka den øvste husrekkja i bebyggelsen tettast på fjellet. Skredet vart fatalt, og ein mann og ei lita jente mista livet. I etterkant vart 170 menneske evakuert frå heimane sine.