Tyfonen «Nepartak» tok menneskeliv og førte til at mange måtte flykte frå heimane sine på Taiwan. Fredag held den fram mot austlege delar av Kina.
Der har flaumar herja etter det kraftige monsunregnet denne veka, og det siste dei treng er meir vatn.
- Les om den alvorlege flaumen i Kina
Nepartak gjekk frå å vere ein tropisk storm til å bli ein kategori fem tyfon med superkrefter på 24 timar. Korleis gjekk det til?
El Niño-restar i Stillehavet
Tilhøva låg perfekt til rette for at Nerpartak skulle få monsterkrefter, skriv Weather.com.
Fleire faktorar spelte på lag med den tropiske syklonen:
Det var ingen vindskjer i atmosfæren der stormen vaks fram. Vindskjer er kraftige endringar i vindretning eller styrke, som ofte kan hindre stormar i å utvikle seg. Nepartak hadde klar bane gjennom det vestlege Stillehavet.
Meteorologane frå USA dreg også at det ikkje var tørr luft i området tyfonen oppstod. Tørr luft kan verke hemmande for ein tropisk storm i voksefasen.
Tropiske orkanar brukar fuktig og varm luft som bensin, og for Nepartak var nettopp varmen er eit stikkord.
Varmt hav gav stormen energi
– Nepartak kunne ete av dei ekstremt høge temperaturane i havet på reisa si, skriv dei amerikanske meteorologane.
Temperaturane låg rundt 30 grader på havoverflata i området den tropiske syklonen vart forma. Det er varmare enn normalen for dette området aust i Stillehavet.
Det siste året har vore prega av ein kraftig versjon av det frykta vêrfenomenet «El Niño». No har El Niño mista piffen, men litt av varmen heng framleis att i havet.
For rundt ein månad sidan åtvara den kinesiske visestatsministeren om at dette fenomenet kunne gi ekstra mykje regn under monsun-tida.
PÅ VEG NED: Temperaturane i Stillehavet er på fallande kurs. På dette kartet over temperaturane i Stillehavet i Juni ser vi likevel at det var litt varmare enn normalen, særleg i dei vestlege delane av Stillehavet.
Foto: www.bom.gov.au/climateDet har nemleg skjedd før.
I 1998 mista meir enn 4000 menneske livet i flaumar i områda kring Yangze-elva, dei same områda som no er råka, skriv The Guardian. Denne vêrhendinga vart også linka til fenomenet El Niño og dei uvanleg høge temperaturane i Stillehavet det året.
Ein kinesisk meteorolog skal ha sagt at regnmønstera er annleis dette året, noko som minskar sjansen for tilsvarande skadeomfang i årets, også svært alvorlege, flaumsituasjon.
