Costa del Vestland - den nye solkysten?

I september var det 10 dagar med meir enn 20 grader i Ålesund. Det er ikkje rekord for området - den stikk 1999 av med, men det er ganske ekstremt.

Hokksund får norgesrekord

Resten av Sør-Norge er også med i rekordheatet, med nye septemberrekordar i Stavanger (27.3 °C) og Bergen (27.2 °C).

Austlandet ligg også an til å få ein av dei varmaste septembermånadene sidan målingane starta, og Hokksund kan skryte av heile 23 sommardagar (temperatur over 20 °C), ny norgesrekord for september.

Trenden går oppover

Ser vi på trenden dei siste åra er det klart at det ikkje berre er Norge som opplever temperaturrekordar. Dei 10 varmaste åra som er registrert, globalt sett, er alle frå dei siste 20 åra. 2015 er det hittil varmaste, men 2016 er på god veg til å slå fjoråret.

Det betyr ikkje at alle septemberdagar blir varme, men sjansen for å få ein varm septemberdag er mykje høgare no enn for berre nokre år sidan.

Vi kan altså rekne med fleire temperaturrekordar i åra framover, både i Ålesund og i resten av landet.

Eit bad i regnet

Dessverre er ikkje dette den einaste typen rekordar vi kan rekne med å slå - varmare luft kan halde på meir fukt, og det har Vestlandet fått oppleve i sommar.

Bergen sette ny nedbørsrekord i juli og august, og på toppen av det heile vart det 9. august sett ny rekord med 76.2 mm på eitt døgn (målt frå kl 8 dagen før).

For oss som er glad i Vestlandet og set pris på strandlivet kan det vere greitt å førebu seg på eit bad i regnet i framtida. Litt mildare, men framleis vått.