Alle får sjå sola denne veka

Sol, varme og sommarvêr står på menyen i alle landsdelar. Men varmen er nok berre på snarvisitt, fortel meteorologen.

Sol i lofoten

SOL: Vi ønskar sola velkommen frå sør til nord denne veka! På Vågakallen i Lofoten kan vere fleire dagar med utsikt som denne i vente.

Foto: @hilling89/Instagram

«Vi vil ha sol!» og «Nå vil vi ha sommar!» lyder ønska frå frustrerte nordmenn på Yr si Facebook-side.

Denne veka har meteorologen endeleg litt godvêrsnytt til oss!

Dei første par dagane ligg det meste av landet framleis i kald og ustabil luft. Enkelte regnbyer og litt grått vêr pregar dei første dagane.

– Austlandet kan få lengre periodar med sol, så det er nok der det blir best i starten av veka, foretel statsmeteorolog Haldis Berge ved vêrvarslinga i Bergen.

Onsdag kjem varmen

Haldis Berge, statsmeteorolog

POSITIV: Det blir jo varmare! Seier meteorolog Haldis Berge om vêret denen veka. Lat oss nyte det, sjølv om det ikkje varar veldig lenge!

Foto: Marit Hommedal

Onsdag kjem den varme lufta mange har venta på. Vestlandet, som har hatt ein litt kjølig start på juli, kan glede seg til temperaturar mellom 20 og 25 grader.

På andre sida av langfjella kan det fort bli i overkant av 25 grader, og skikkeleg badevêr. Om veka startar grått, så vil alle til slutt få ein smak av sommarvêret.

– Varmen kjem først sør i landet og trekk seg etter kvart nordover, forklarer Berge.

Difor kan trønderane få ein våt start på onsdagen, men torsdag kjem varmen også dit.

Lufta held fram ferda til Nordland og etter kvart Troms, medan fredag når den heilt opp til Finnmark.

Sommer i Telemark

TELEMARK: Sola er ikkje fråverande sjølv om vêret er ustadig for tida. Takk for at de deler så fine bilde med oss på #yrny, her er litt sommarstemning frå Telemark.

Foto: @sigurdsvela/Instagram

Ingen langvarig opptur

– Det er meir ein høgtrykksrygg enn eit skikkeleg høgtrykk som kjem inn, fortel meteorologen.

Ho må skuffe dei som hadde håpa på langvarig steikvarme, for høgtrykksryggen er ikkje sterk nok til å halde lågtrykka vekke så lenge.

Prognosane for denne veka har ikkje heilt klart å bestemme seg, men ser no ut til å lande på at det kjem gråvêr inn igjen torsdag.

– Det kjem nok eit nedbørsområde inn heilt sør og i vest torsdag, så brer det seg nordover. Det kan fort også kome med torevêr, fortel meteorologen.

Nord-Noreg trekk eit litt lengre strå enn resten av landet: Der kan varmen halde stand inn i helga.

Sjølv om det ikkje er utelukkande strålande sommarvêr denne veka, ser meteorologen lyst på meldingane.

– Det er jo varmare! To dagar med over tjue grader er det ei stund sidan vi har sett, i alle fall her på Vestlandet sør for Stad, helsar meteorologen frå kontoret i Bergen.

Tysdag 19.juli

HØGTRYKKSRYGG: Ryggen som kjem inn med varmluft og finvêr ikkje sterk nok til å halde stand mot lågtrykka lenge. Men vi klagar ikkje, den gir oss alle ein smak på varmen att!

Foto: Yr.no