Austlandet og Sørlandet trefte blink med kanovêr i haustferien førre veke. Forklaringa er eit rekordkraftig høgtrykk som har gitt mange soldagar over heile landet.
Og det ser ut til at dei som har haustferie på Vestlandet, i Sør-Trøndelag og Hedmark og Telemark denne veka, blir like heldige.
– Det er litt meir usikkert inn mot helga. Elles er det eit kraftig høgtrykk som gjer at det ligg an til ein haustferie av dei sjeldne, slår statsmeteorolog Martin Granerød fast.
Todelt land
Meteorologen fortel av landet vårt er todelt når det gjeld vêret fram til og med torsdag, og det er Sør-Norge som er vêrvinnaren.
– Det blir veldig mykje fint vêr frå sentrale delar av Nordland og sørover. Det blir nok litt meir skyer på Aust – og Sørlandet enn Vestlandet og Midt-Norge. Men også på Austlandet blir det lange periodar med sol.
Temperaturane blir haustlege med om lag 10 grader på dagtid. På natta blir det kaldt og det kan bli nattefrost, hovudsakleg i indre strøk. Fram til fredag blir det også lokal morgontåke fleire stader.
Regn i nord
Eit lågtrykk rundt Spitsbergen gir pålandsvind og nedbør i dei nordlegaste delane av Nordland og nordover i landet.
– Med pålandsvinden kjem det regn og regnbyer. Men det er ikkje venta store nedbørsmengder. Det kjem også vind opp i liten til stiv kuling i kystområda frå sørvest og vest tysdag og onsdag, fortel Granerød.
Endring mot helga
Det kraftige høgtrykket går sakte men sikkert sørover i løpet av veka.
– Inn mot helga er det sjansar for litt meir skya vêr og nedbør, særleg på Aust- og Sørlandet. For Vestlandet sin del ser det bra ut også inn mot helga, men frå laurdag er det litt meir usikkert.
– I Nord-Norge blir det tørrare mot slutten av veka. Det er hovudsakleg tysdag, onsdag og torsdag som blir prega av lågtrykket som ligg i nærleiken av Svalbard, seier statsmeteorolog Martin Granerød.
