yr.no blir vidareutvikla fortløpande, og det kjem heile tida nye tenester og tilbod på sidene. I tillegg til dette blir det òg arbeidd kontinuerleg med å gjere sjølve varsla endå meir nøyaktige og pålitelege.
I versjonen som vart lagt ut 3. desember, er det retta nokre feil i tillegg til at det kjem nye funksjonar og innhald.
Betre søkjemotor
Søkjemotoren på yr.no har vore så og seie uendra frå lanseringa i fjor og til no. Søket har fungert svært godt i Noreg, og frykteleg dårleg i utlandet.
I den nye versjonen av søket har vi gjort tre viktige endringar:
- Vi har arbeidd mykje med å gjere rekkefylgja på søkjeresultatet betre. No kjem store byar i utlandet høgt opp, i staden for hulter til bulter nedover i lista. Vi har òg fjerna ein del av dei mest obskure stadnamna (alle leprasjukehus er for eksempel fjerna frå yr.no)
- Dei mest brukte kategoriane av stadnamn kjem i ei eiga liste på toppen av søket. I denne lista finn du store byar og andre utplukka stadnamn i Noreg.
- Det er letttare å snevre inn søket til berre eitt land: Over søkjeresultatet ligg det no ei line med landsnamn og flagg som du kan klikke på; då snevrar søket seg inn slik at du søkjer i berre dette landet.
Fleire observasjonar
Til no har yr.no vist ein observasjon dersom det har vore ein målestasjon i nærleiken av staden du ser på varsel for. Dette er no utvida, slik at du alltid får opp dei tre nærmaste målestasjonane.
Observasjonar er faktiske målingar av korleis vêret er, i motsetnad til varsel (som viser korleis vi ventar at vêret blir). Observasjonane er nyttige for å vurdere om varselet stemmer eller ikkje, i tillegg til at dei gjev eit godt bilete av vêrsituasjonen akkurat no.
Soloppgang og –nedgang
Vi har fått svært mange spørsmål om soloppgang og –nedgang til yr.no. Det har teke ein del tid å få tilgang til algoritmane for utrekning av soloppgang og –nedgang, men no er den fyrste delen av arbeidet gjort. Du finn informasjon om når sola og månen går opp og ned på litt under kartet på alle varsel-sidene på yr.no.
I neste versjon av yr.no håpar vi å få ordna alle symbola i dei vanlege varsla, slik at desse visar korrekt soloppgang- og nedgang.
